Perintah Sarawak deka mantu Watson Nyambek

KAPIT: Perintah Sarawak deka mantu ex-jaguh 100 meter menua, Watson Nyambek mutarka penanggul utang bank iya.

Kepala Menteri Datuk Patinggi Tan Sri Adenan Satem madahka perintah nengeri tu meruan ingatka jasa ti udah digaga Watson ke udah mujur ngenampakka nama Sarawak.

“Aku minta ampun, aku baru nemu pekara tu diatu,” ku iya rambau aum pengarang berita pengudah bejadika Program Sejiawa Senada ditu kemari.

Bejulukka nama ‘Flying Dayak’, Watson ti mengkang megai rikod 100m menua tu udah dikenukuka bankrap ari sebuah bank ketegal lon RM80,000 dikena mayar ungkus perubat niang apai iya.

Penerang pasal iya ti dikenukuka bankrap ketegal enda tebayarka utang nya bisi dibantaika Opis Insolvensi nengah The Borneo Post kena 4 March tu tadi.

Nitih ku Watson, iya ngambi duit jali ari bank nya dikena mayar ungkus perubat niang apai iya ti ditepan penyakit riman pending.

Ku iya, riman pending nya majak ngerekai ngagai mata lalu ngujungka niang apai iya midang dua taun ke udah.

Dulu agi ari nya, Sapit Menteri Pemansang Menua Pesisir enggau Kandang Menua, Datuk Alexander Nanta Linggi madahka bala ketuai bansa Dayak ari perintah deka beratika penusah ditapi Watson lalu sida deka naka ulih mantu iya.

Pia mega ku iya, gerempung ukai dikuasa perintah (NGO) Dayak baka Gerempung Bansa Dayak Sarawak (SDNU) deka naka ulih ngumpul belanja dikena nyaup penusah Watson.

Dulu agi ari nya, Adenan bisi ngemendarka belanja inisiatif penyampau RM1 juta dikena ngemansangka menua Nanga Merit.

Ku Adenan, Nanga Merit udah dikenukuka nyadi sub-pelilih tang peranak menua nya majak kurang ketegal mindah ngagai menua bukai.

“Diatu kitai deka ngemansangka menua nya ngambika rayat deka pulaika ke menua asal diri.

“Ba runding aku, Kapit tu sigi patut bisi seiti agi sub-pelilih menua begulai enggau pelilih menua enggau sub pelilih menua ke bukai iya ke udah dikenukuka aku,” ku iya.

Nangkan nya, Kepala Menteri mega bisi ngemendarka belanja penyampau RM5 juta dikena nyilih sistem batang paip di pasar nya.

Sama bisi datai iya nya bini Adenan, Datin Patinggi Datuk Jamilah Anu, Sapit Kepala Menteri, Datuk Patinggi Tan Sri Alfred Jabu, Menteri Pemansang Tanah, Tan Sri Datuk Amar Dr James Jemut Masing, Sekretari Perintah Sarawak, Tan Sri Datuk Amar Morshidi Abdul Ghani, Menteri Pengawa Berumah, Datuk Amar Abang Johari Tun Openg, Tan Sri Datuk Amar Leonald Linggi Temenggong Jugah, Kaban Parlimen (MP) Kapit Datuk Wilson Ugak Kumbong sereta Menteri Muda Main Asal enggau Pesaka Bansa, Liwan Lagang.

Lebih 20,000 iku mensia mayuh bisi datai ngulu program nya.-BP