Uggah Dipadu Nyadi Menteri Pekara Ukai Islam

KUCHING: Sapit Kepala Menteri, Datuk Amar Douglas Uggah Embas dipadu nyadi menteri ti mangku tanggungpengawa dalam Hal Ehwal Ukai Islam ba nengeri tu.

Pekara tu udah dibantaika Kepala Menteri Datuk Patinggi Tan Sri Adenan Satem dalam Kaunsil Aum Perintah Nengeri (MMKN) apin lama ke udah.

Kenu ku Uggah, tu keterubah iya pangku pengawa nya dituku lalu tu nyadi sejarah dalam langkar pengawa Perintah Nengeri pengudah lebih 50 taun merintah.

“Pemutus numbuhka seiti agi bidang kuasa baru tu terang ngayanka Tok Nan seiku Kepala Menteri ungkup semua rayat Sarawak.

“Tu mega nyadi seiti da agi polisi inklusif Kepala Menteri kitai nambah ngagai 53 pekara dijapai iya sebedau Pengawa Bepilih Nengeri (PRN) suba.

“Aku pechaya tanggungpengawa baru tu deka nyadi jematan penyambung ti efektif entara perintah Barisan Nasional (BN) enggau komuniti ukai Islam di nengeri tu,” ku iya.

Iya mantaika jaku nya rambau bejadi ba Ngintu Malam Gawai Parish St. Francis Kota Samarahan ba Balai Parish St. Francis semak ditu malam kemari.

Uggah ke mega nyadi Menteri Betanam Betupi Moden enggau Ekonomi Menua Pesisir madah pemisi bidang kuasa tu beguna amat ngagai rayat kelebih agi sida ke ukai Islam ba nengeri tu.

Nengah tu deka ngasuh bemacham badan jalai pengarap ukai Islam berinteraksi enggau perintah BN enggau menyana agi.

Kelimpah ari nya, iya mega nyadi pelasar endur mantai sereta bejuraika pekara-pekara ngenegapka agi pemaik jalai pengarap ba Sarawak.

“Aku nemu bisi Residen Dayak ti ngatur pekit ngaji al-Quran, Pemesai Pelilih Melayu ngatur pengerami Gawai Dayak lalu enda tinggal mega arkitek China sida nirika masjid.

“Pemanah pengawa tu udah nyadi tradisi ba Sarawak alai kerejasama entara pupu raban bansa enggau jalai pengarap nya seruran dikemeran.

“Encjabar ke ditapi kitai diatu iya nya teknologi arus penyambung baru alai berita ke enda manah enggau sensitif ulih dikerembai enggau muntang dalam sesiken.

“Nya alai, kitai patut nyeliah ari ngaga sebarang penerang ke tau medis ati orang bukai laban enda semua penerang ti dikerembai nengah online nya amat,” ku iya.

Rambau pengerami nya, Uggah bisi nyuaka agih belanja penyampau RM30,000 ngagai Parish St. Francis Kota Samarahan dikena bejalaika aktiviti tauka program begulai enggau komuniti.-UB