Ketuai raban bansa Orang Ulu di Telang Usan temegahka penyiru Adenan ba sida

MIRI: Raban ketuai komuniti Orang Ulu di Telang Usan meri besai terima kasih ngagai Kepala Menteri Sarawak Datuk Patinggi Tan Sri Adenan Satem laban udah nyatup peneka enggau mendingka peminta rayat rambau randau betambit pintu di Miri apin lama ke udah.

Ketuai Raban Bansa Kayan, Temenggong Elizberth Deng madah, Datuk Patinggi Adenan pemerat ngagai raban bansa Orang Ulu enda ulih disakal agi laban munyi ku iya, pemesai guna gempung raban komuniti ngambika ulih mansang sereta ngereja pengawa begulai enggau perintah.

“Penemu Kepala Menteri tu chukup tebuka. mendingka runding mensia mayuh ari renggat baruh lalu kami, komuniti Orang Ulu pechaya, bepelasarka pemintar runding Adenan dalam ngintu pengelantang pendiau raban komuniti,” ku Elizberth Deng madah ngagai ‘The Borneo Post’ ensana.

Ku Elizberth, Adenan bisi awak ke manah ungkup Orang Ulu lalu ngemeratka pemesai guna gempung raban komuniti dikena nyeliahka petalat sereta bekerejasama ngambi pulaika penguntung ngagai peranak Baram enggau Telang Usan.

Ngembuan runding ke sama, Pemancha Gilbert Ding ngansak raban komuniti bejalaika pengawa ngaling perintah enggau pengari rayat nyerumba pemerat Kepala Menteri mantu raban komuniti menua pesisir.

Ku iya, belanja tambah ke dipinta Kepala Menteri dikena ngemansangka kandang menua pesisir nyengala mantaika iya bebendar deka ngenyemaka seraka pemansang entara mengeri enggau ba menua pesisir.

Kami meri besai terima kasih ngagai Kepala Menteri laban udah meri pemerat ngagai raban komuniti sereta mega juluk iya deka ngemansangka kandang menua pesisir di Sarawak kelebih agi ba Baram enggau Telang Usan udah nyadi nyata nengah pengawa ngaga Jematan Long Lama, muka jalai pemansang ngagai menua tengah enggau ulu Baram, ku iya.

Berebak enggau nya, Kaunsilor Jau Eng Aran disukung raban ketuai komuniti meri besai terima kasih ngagai Adenan ke udah bebendar ngemansangka bansa Orang Ulu sebaka enggau raban bansa bukai di nengeri tu.

Adenan seiku ketuai ke bisi wawasan lalu balat ngemeratka rayat sereta udah ngaga lebih ari 45 bengkah pemutus nyatup peminta peranak Sarawak, ku iya.-UB